Sunday, January 23, 2011

തടാകം


കാതങ്ങള്‍ മദിച്ചൊഴുകി,
എത്തിച്ചേരുവാന്‍
ഒരു കടലുള്ളിടത്തോളം കാലം
നദികള്‍ നദികളായ് ത്തന്നെ
ഒഴുകുമായിരിക്കും.
കരപോലും സ്വന്തമെന്നു
അഹങ്കരിക്കുമായിരിക്കും.

അടിയൊഴുക്ക് കുറഞ്ഞ്‌
സങ്കടങ്ങള്‍ സഹിച്ച്‌
മെല്ലെ, അതൊരു തടാകമാകും.
മരങ്ങളുടെ തണല്‍ പോലും
സ്വന്തമല്ലെന്ന അറിവില്‍
വീണ്ടും വീണ്ടും ചുരുങ്ങും.

തള്ളാനാവാത്ത വന്നുചേരലുകളില്‍ നിന്നും
പൊട്ടിയൊലിക്കാനാവാത്ത തടാക നീല!

സഞ്ചാരികള്‍-
പ്രണയിക്കുന്നവര്‍
കാലുകഴുകി, കാഴ്ച കാണാന്‍ വന്നു പോകുന്നവര്‍
ഏകാന്തത കടംകൊള്ളാന്‍ വരുന്നവര്‍
ഒറ്റയാകല്‍ തിരിച്ചറിഞ്ഞു മിണ്ടാതിരിക്കുന്നവര്‍
കാഴ്ച കൊണ്ടുമാത്രം തൊട്ടുനോക്കി പോകുന്നവര്‍..

കടലിലേയ്ക്ക് വഴികളില്ലാതായ നദി-
താമരപ്പൂക്കളുടെ
വര്‍ണ്ണ മേലാപ്പിനു കീഴെ
അസഹ്യത പേറുന്ന
വെറും തടാകം!

1 comment:

  1. തള്ളാനാവാത്ത വന്നുചേരലുകളില്‍ നിന്നും
    പൊട്ടിയൊലിക്കാനാവാത്ത തടാക നീല!

    ഇഷ്ടപ്പെട്ടു.

    ReplyDelete

Followers

About Me

My photo
പാതിയില്‍ മുറിഞ്ഞു മിടിക്കുന്ന ഇന്നലത്തെ സ്വപ്‌നങ്ങള്‍..